ထိုင်းနိုင်ငံတောင်ပိုင်းမှာ မြန်မာအလုပ်သမားများ ဆန္ဒပြ

ထိုင်းတောင်ပိုင်း SIA ငါးသေတ္တာစက်ရုံမှာ ဆန္ဒပြနေတဲ့ မြန်မာလုပ်သားများကို မေးမြန်းဆွေးနွေးနေတဲ့ ထိုင်ရဲများ (ဓာတ်ပုံ – ထွန်းထွန်းနိုင်/Southern Thailand)

ထိုင်းနိုင်ငံတောင်ပိုင်း မလေးရှားနယ်စပ် အနီးမှာရှိတဲ့ ဆောင်ခလာခရိုင် အတွင်းက Siam International food (SIF) ငါးသေတ္တာ စက်ရုံမှာ အလုပ်လုပ်နေကြတဲ့ ရွှေ့ပြောင်းမြန်မာ အလုပ်သမား ၁ ထောင်ကျော်က အလုပ်မဆင်းဘဲ ဆန္ဒပြ တောင်းဆိုနေတယ်လို့ သိရပါတယ်။
“ကျနော်တို့ အလုပ်သမားတွေကို သုံးရက်ဆက်တိုက် အလုပ်ပျက်ကွက်ရင် အလုပ်ဖြုတ်မယ်ဆိုပြီး စကားပြန်က တဆင့် ပြောလာရာက ဖိနှိပ်မှုတွေ မလုပ်ဖို့နဲ့ ကျနော်တို့ ရရှိသင့်တဲ့ အခွင့်အရေးတွေပေးဖို့ စုပေါင်းပြီး ဆန္ဒဖော်ထုတ် နေကြတာ” လို့ ရခိုင်ပြည်နယ် ကျောက်တော်မြို့နယ်သား ကိုမြင့်စိုးက ဧရာဝတီကို ပြောပါတယ်။

မြန်မာရွှေ့ပြောင်း အလုပ်သမားတွေဟာ စက်ရုံလုပ်ငန်းခွင်အတွင်း သူတို့အပေါ် ဖိနှိပ်မှုတွေရပ်ဖို့နဲ့ အလုပ်သမား အခွင့်အရေး ခံစားခွင့်တွေ ထားရှိပေးဖို့ ငြိမ်းချမ်းစွာ တောင်းဆိုနေကြတာ ဖြစ်တယ်လို့ ဆန္ဒပြ မြန်မာအလုပ်သမားတွေက ပြောပါတယ်။
အလုပ်သမားများ ကျန်းမာရေး မကောင်းလို့ အလုပ်မဆင်းနိုင်ခြင်းအပေါ် ဖိအားပေးစေခိုင်းခြင်း၊ အလုပ်သမား ခေါင်းဆောင်တွေရဲ့ ဖိနှိပ်ခံရမှုတွေအပေါ် စက်ရုံအနေနဲ့ ကာကွယ်ပေးဖို့နဲ့ အလုပ်နားရက် အပြည့်အဝ နားခွင့်ပြုဖို့ အပါအဝင် ရောဂါအလိုက် စောင့်ရှောက်မှုတွေ ပြုလုပ်ပေးဖို့အတွက် ဆန္ဒပြ အလုပ်သမားတွေက တောင်းဆိုချက် ၇ ချက် ထုတ်ပြန် တောင်းဆိုထားပါတယ်။
“နေမကောင်းလို့ အနားယူရင် ဝဏ္ဏ (အလုပ်သမားခေါင်းဆောင်) တွေက လိမ်တယ်ဆိုပြီး ရိုင်းရိုင်းပြပြ ဆဲတယ်။ ပိုက်ဆံ ဖြတ်တယ်။ နေမကောင်းဘူးဆိုရင် ဆေးစာ ယူလာခိုင်းတယ်။ ဆေးစာယူလာပေးရင်လည်း လုပ်အားခထဲက ဖြတ်တာပဲ။ ကျနော်တို့မှာ အဲဒီလိုမျိုး အမျိုးမျိုး အနိုင်ကျင့်တာကို ခံနေရတယ်” လို့ မြန်မာအလုပ်သမား ကိုယုလှိုင်က ပြောပါတယ်။
အလုပ်ပိတ်ရက် တနင်္ဂနွေနေ့မျိုးမှာ အလုပ်ဆင်းခိုင်းရင် လုပ်အားခ နှစ်ဆပေးဖို့နဲ့ အလုပ်ချိန် ၈ နာရီအတွင်း အလုပ်သမား တယောက်ကို တနာရီ ၈ ကီလိုပြီးအောင် လုပ်ပေးဖို့ အချိန်သတ်မှတ် ဖိအားပေး ခိုင်းစေမှုကို ဖျက်သိမ်းပေးဖို့နဲ့ အလုပ်သမား တန်းလျားမှာ ရေကောင်းရေသန့် ရရှိဖို့အတွက်လည်း အလုပ်သမားတွေက တောင်းဆိုကြပါတယ်။
နေပူထဲမှာ ဆန္ဒပြနေတဲ့ မြန်မာ အလုပ်သမားတွေကို ဒေသခံ ထိုင်းရဲတပ်ဖွဲ့က လုံခြုံရေး ယူပေးထားပြီး အလုပ်သမားတွေရဲ့ လိုအပ်ချက် တောင်းဆိုချက်တွေကို အသေးစိတ် မေးမြန်း မှတ်တမ်းယူခဲ့တယ်လို့ သိရပါတယ်။ စက်ရုံတာဝန်ရှိသူတွေဘက်က အလုပ်သမား ခေါင်းဆောင် ဆယ်ဦးကို ရွေးပြီး လာရောက်ဆွေးနွေးဖို့ တောင်းဆိုထားတယ်လို့ ဆိုပါတယ်။
“ကျနော်တို့ဘက်က အခုတောင်းဆိုထားတဲ့ ၇ ချက်ဟာ အားလုံးရဲ့ သဘောထားပဲ။ ဒါတွေကို ကျနော်တို့ အားလုံးရှေ့မှာ သဘောတူရင် ကျေနပ်တယ်လို့ ပြောလိုက်တယ်။ အရင်ဆန္ဒပြပွဲတွေတုန်းက သွားဆွေးနွေးတဲ့ ခေါင်းဆောင်တွေကို စည်းရုံးလိုက်လို့ တောင်းဆိုချက်တွေ ဘာမှ အရာမထင်ခဲ့ဘူး” မန္တလေးတိုင်း ကျောက်ပန်းတောင်း မြို့နယ်က အလုပ်လာလုပ်တဲ့ ကိုကျော်စွာလင်းက ဧရာဝတီကို ပြောပါတယ်။
Siam International food (SIF) ငါးသေတ္တာ စက်ရုံမှာ စုစုပေါင်း မြန်မာ အလုပ်သမား ၃၀၀၀ ကျော် လုပ်ကိုင်နေကြပေမယ့် နေထိုင်ခွင့်နဲ့ စားဝတ်နေရေး အခြေအနေ ထိခိုက်မှာကို စိုးရိမ်နေကြတဲ့ အလုပ်သမားတွေက ဖိနှိပ်မှုတွေ ခံနေရပေမယ့်လည်း ဆန္ဒပြပွဲမှာ ပူးပေါင်းပါဝင်နိုင်ခြင်း မရှိဘူးလို့ ဆိုကြပါတယ်။
“ကျနော်တို့တွေ တောင်းဆိုတဲ့ ၇ ချက်ဟာ စက်ရုံ စီးပွားပျက်သွားမယ့် အရာတွေ မဟုတ်ဘူး။ အကြီးအကျယ် ထိခိုက်သွားစေမယ့် အရာတွေလည်း မဟုတ်ဘူး။ ကျနော်တို့ ရသင့်ရထိုက်တဲ့ အခွင့်အရေးကို တောင်းဆိုတာပါ။ ဒီတခေါက်ကတော့ တောင်းဆိုချက်တွေ မရမချင်း ကျနော်တို့ ဆန္ဒပြပွဲရပ်မှာ မဟုတ်ပါဘူး” လို့ ကိုကျော်စွာလင်းက ပြောပါတယ်။
SIF ငါးသေတ္တာစက်ရုံ ဆန္ဒပြ ခံရမှုဟာ တတိယအကြိမ် ဖြစ်ပြီး လက်ရှိတောင်းဆိုနေတဲ့ အလုပ်သမား အခွင့်အရေးတွေ ရရှိဖို့အတွက် အရင်က နှစ်ကြိမ်တောင်းဆိုခဲ့ဖူးပြီး ထိရောက်တဲ့ ပြေလည်မှုတွေ မရရှိခဲ့ဘူးလို့ သိရပါတယ်။
credits :  http://burma.irrawaddy.org/news/2015/02/24/71662.html