မိုးပွင့်စစ်ဆင်ရေးဖြင့် မှတ်ပုံတင်ထုတ်ပေးရာတွင် ကျောက်ဖြူနယ်တွင် ငွေကောက်ခံမှုများရှိနေဟုဆို
|
20:25:00 |
No comments |
ကျောက်ဖြူ၊ မေလ ၇
ရခိုင်ပြည်နယ် ကျောက်ဖြူမြို့နယ် ကင်းမြောက် ကျေးရွာအုပ်စုတွင် မိုးပွင့် စစ်ဆင်ရေးဖြင့် မှတ်ပုံတင်များ ပြုလုပ်ရာတွင် ငွေကြေးကောက်ခံမှုများ ရှိနေကြောင်း ကျေးရွာသားများက သတင်း ပေးပို့သည်။“ မိုးပွင့်စစ်ဆင်ရေးနဲ့ မှတ်ပုံတင်တွေ ပြုလုပ်တဲ့ နေရာမှာ ငွေမပေးရဘူးလို့ အစိုးရက ပြောပါတယ်။ အခု တစ်ယောက်ကို အသစ်လုပ်ရင် ၂၅၀၀ ကျပ်စီ ပေးရပါတယ်။ ကြံ့ခိုင်ရေးပါတီမှ ဦးမောင်စံရွှေက ဦးဆောင်ပြီး ကောက်ပါတယ်” ဟု ကျေးရွာသား တစ်ဦးက ပြောသည်။
ထိုသို့ ကောက်ခံရာတွင် အသစ်ပြုလုပ်သူ တစ်ဦးကို ၂၅၀၀ ကျပ်၊ အဟောင်းနှင့် အပျက် လဲလှယ်လျှင် တစ်ဦးကို ရှစ်ထောင်ကျပ်စီ ကောက်ခံသည်ဟု သူက ဆက်လက် ပြောကြားသည်။
“ ကျွန်တော်တို့ ဒေသမှာ လူတွေ အရမ်းဆင်းရဲတော့ ပိုက်ဆံ ရှစ်ထောင် ဘယ်သူမှ မပေးနိုင်ဘူး။ ဒါကြောင့် အသစ်လုပ်သူလောက်ဘဲ မှတ်ပုံတင်ရပြီး အဟောင်းနဲ့ ပျောက်ဆုံးသူတွေက ပိုက်ဆံ ရှစ်ထောင် မသွင်းနိုင်တော့ မရလိုက်ဘူး” ဟု တစ်ခြားရွာသား တစ်ဦးက ဆိုသည်။
အဆိုပါ ကိစ္စနှင့် ပတ်သက်ပြီး ကင်းမြောက်ကျေးရွာ အုပ်စု အုပ်ချုပ်ရေးမှူး ဦးမောင်ကြည်အား မေးမြန်းရာ မဟုတ်မှန်ကြောင်း ငြင်းဆိုသည်။
“ ဒီ သတင်းမှားပါတယ်။ ကောက်တာက တစ်ထောင်လောက်ဘဲ ကောက်တာပါ။ ဓာတ်ပုံ သုံးလေးပုံ ရိုက်ရတဲ့ အတွက် ကောက်တာပါ။ ဦးမောင်စံရွှေက ကျေးရွာ အုပ်စု လူမှု အထောက်အကူပြု အတွင်းရေးမှူးအဖွဲ့မှာ ပါဝင်တော့ တစ်ရွာလုံး လုပ်တာ မဟုတ်တဲ့အတွက် ဓာတ်ပုံခ တစ်ထောင်ဖိုးလောက် ကောက်တာ ဖြစ်ပါတယ်” ဟု အုပ်ချုပ်ရေးမှူးက ပြောဆိုသည်။
ယခု မိုးပွင့်စီမံကိန်း ပြုလုပ်ရာတွင် အသစ်လုပ်သူများကိုသာ မှတ်ပုံတင် ထုတ်ပေးခြင်း ဖြစ်ပြီး အဟောင်းနှင့် ပျောက်ဆုံး ပျက်စီးသူများကို ထုတ်ပေးခြင်း မဟုတ်ကြောင်း၊ သို့အတွက် အဟောင်းနှင့် ပျက်စီး ပျောက်ဆုံးသူများမှာ ငွေ ရှစ်ထောင် မပေးနိုင်သဖြင့် မရလိုက်ခြင်းမှာ မဟုတ်မှန်ကြောင်း၊ ရခိုင်အမျိုးသား ပါတီဝင် အချို့မှ နားလည်မှု လွဲ၍ မိမိမှ ရှင်းပြလိုက်ပြီ ဖြစ်ကြောင်း ကျေးရွာအုပ်ချုပ်ရေးမှူးက ပြောကြားသည်။
ကျေးရွာသား တစ်ဦးကမှု သူ့အနေဖြင့် မှတ်ပုံတင် အသစ်လုပ်ရာတွင် ကျပ် ၂၅၀၀ ပေးလိုက်ရကြောင်း အတည်ပြု ပြောဆိုသည်။
ယခု တစ်ခေါက် ကင်းမြောက် အုပ်စုတွင် မှတ်ပုံ အသစ် ပြုလုပ်ရာ ရရှိသူ ကျေးရွာသား အရေအတွက်မှာ စုစုပေါင်း ၁၃၀ ရှိကြောင်း သိရသည်။
0 comments:
Post a Comment