ဆရာဂျော်ဂျီဧ့ ယိုင်းယင်ယင်ယိုင်း ကဗျာ

Date. 10.3.2016 

Time: 17:00:18:00 

DJ .. Zin Myo

 သာလီစွပါ.. MAP Radio FM 102.50 MHz ရခိုင်တိုင်းရင်းသားဘာသာ အစီအစိုင်ကို အားပီးနားထောင်နီဂတ်တေ ရခိုင်သူ ရခိုင်သားတိကို ဒေတစ်ပါတ်မှာဆိုကေ ကျနော် ဇင်မျိုး အကူအညီ တောင်းဆိုမှုအရ စာရီးဆရာ ဂျော်ဂျီ(ရခိုင်ပြည်)မှ စစ်တွေကနီလို့ ပီးပို့လာရေ ရွာဓလိကဗျာချေတစ်ပုဒ်​ကို ထုတ်ရွှင့်​ပီးလားဖို့ ဖြိုက်ပါရေ။ ကဗျာချေ နာမေက .. "ယိုင်းယင်ယင်ယိုင်း" လို့ နာမေရပါရေ...။

"ယိုင်းယင်ယင်ယိုင်း"

ငါ့ရင်ခွင်မာထိုင်ဗျာလ် မေထွီးယေနန့်လေ့ တွိခကတ်တေ..။

 ငါ့ရင်ခွင်မာထိုင်ဗျာလ် မာရယုနန့်လေ့ သိခကတ်တေ..။

 ငါ့ရင်ခွင်မာထိုင်ဗျာလ် ချတုံးကိုးလံ တက်ပြန်ကိုလေ့ ခတ်ခကတ်တေ..။

 အဂုဒေချိန်... ရပ်ဝီးမြီခြား လျှာဖျားနန့်ပြောရေဒေသမာ ပျောက်တေလူကပျောက်...။

ပင်လယ်ရပ်ခြား ဟမ်ဘာဂါစားရေဒေသကို ရောက်တေလူကရောက်...။

ငါ့ကိုမှတ်မိကတ်သိ့ယင့်လား !!!

မင်းရို့အချေခါ... မင်းရို့မောင်နှမတစ်စု ပျော်ကတ်စီဖို့ ငါ့ရင်ခွင်မာအပြည့်ထည့်ဗျာလ် ဘေးတိုင်တိလှုပ်ပါအောင် ငါယိုင်းထိုးခဖူးရေ...။

 မင်းရို့သားသမီး ငါ့မြီးချေတိ ငါ့ရင်ခွင်မာ ဝင်ထိုင်ဖို့ ပြန်လာနိုင်ကတ်ဖို့သိလား !!! ဒေရွာမာ အဖက်လုပ်ဖို့လူမဟိရေငါ အိမ်ပေါက်ဝ နပြင်မာ နုံးချင်းတည်း ဇာအချိန်ထိ နီရဖို့သိ့လေးးး ငါ့အသက်လေ့ ထောက်လာယာယ် မြောက်လီလေ့ဆုတ် နွီသရုပ်လေ့ပေါ်လာယာယ် တလင်းလေ့ကျ လ,လေ့ပလာယာယ် သင်္ကြန်မတိုင်ခင် အပြီးအပိုင် ပြန်လာကတ်ပါဖိဝေ... မှင်းကျိုးပင်အောက်က ငါမျှော်နီရေ...

မင်္ဂလာပါ အဂု အထက်မှာ စာရီးဆရာ ဂျော်ဂျီ(ရခိုင်ပြည်) ပို့ပီးလာရေ ကဗျာချေကို ကျနော် နားလည်သလောက် ယှင်းပြအဓိပ္ပာယ် ဖွင့်ပီးရဖို့ဆိုကေ .. ကျနော်ရို့အချေခါ အိမ်အောက်မှာပဲ ဖြိုက်ဖြိုက် မှင်းကျိုးပင်အောက်မှာပဲဖြိုက်ဖြိုက် လောင်းအကျိုးကို ပခက်လုပ်ဗနာ စီးဖူးဂတ်ပါဖို့။ ပခက်ဆိုစာက ကျနော်ရို့ ကျောက်ဖြူစကားပါ။ တချို့မှာ ယိုင်း လို့လည်း ခေါ်ဂတ်ပါရေ ..။ ယင်းပိုင် ပခက် လုပ်ရေအခါ များ​သောအားဖြင့် လောင်းအကျိုးနန့်​ရာလုပ်ကတ်​တေ။ ဟုတ်ပါရေမနား။ အဂု အားပီးနားထောင်နီဂတ်​တေ ပရိတ်သတိအထဲမှာ လောင်းအကျိုးကို ပခက်လုပ်ပနာ စီးဖူးဂတ်ပါဖို့။ လောင်းအကျိုး မဟိရေလူမှာတော့ ပျိုင်ဘောက်နဲ့ လုပ်ဂတ်ပါရေ။ ယေကေ အောက်မှာ ကျနော် ပြန်ဆိုပြပါမေ။ နားထောင့်ကြည့်​ပါ… (ငါ့ရင်ခွင်မာထိုင်ဗျာလ် မေထွီးယေနန့်လေ့ တွိခကတ်တေ..။ ငါ့ရင်ခွင်မာထိုင်ဗျာလ် မာရယုနန့်လေ့ သိခကတ်တေ..။ ငါ့ရင်ခွင်မာထိုင်ဗျာလ် ချတုံးကိုးလံ တက်ပြန်ကိုလေ့ ခတ်ခကတ်တေ..) ယား ဇာပိုင် အဓိပ္ပါယ် ရပါလဲ..။ ယင်း ပခက်ထက်မှာ စီးနီဂတ်ယင်း အဖိုးသျှင်​ အ​ဘောင်​သျှင်​ရို့​ပြောပြ​ရေ... (တင်းခွန်​ယယတ်​ လီသသွတ်​နန့်​ ဇရပ်​​ကေသာယာ ကျီးဖြူရွာ ဇာမာပါ​လေး ဇာမာ​လေး) နန့်​ နား​ထောင်​ခ​ရ​ရေ ​အပြန်​အလှန်​​ကျေးဇူးသိတတ်​ကတ်​​တေ ​မေထွီး​ချေနန့်​ ကျီးဖြူရွာအ​ကြောင်း။ ပခက်​မာထိုင်​ ဘားဘာ အီ​ယောင်​ရို့ရင်​ခွင်​ကိုမှီဗနာ နား​ထောင်​ခကတ်​​တေ ဘီလူးတိကိုနှိမ်​နှင်းဗျာလ်​ ပထမဓညဝတီကို တည်​​ထောင်​ခ​ရေ ရခိုင့်​သူရဲ​ကောင်း ဘုရင်​မာရယုအ​ကြောင်း။ လ,ပ ပပြင်​မာ အ​ဘေကြီးရို့ ဂိုးကြီးရို့ ​ပြောပြစွာကို နား​ထောင်​ဗနာ အားကျခရ​ရေ အာရက္ခဒဏ္ဍာရီ အာဇာနီသူရဲ​ကောင်း သံကိုး​မောင်းအ​ကြောင်း။ ယင်းပိုင်​နန့်​ ပခက်စီးနီယင်း ကိုယ်​ရို့ရိုးရာ ဝထုချေတိ အရင်က ကိုယ့်ထီး ကိုယ့်​နန်း ကိုယ့်​ကြငှန်းနန့်​ နီထိုင်​ခကတ်​​တေ ဖိုးဖီးဇူဇာရို့အ​ကြောင်းတိကိုနား​ထောင်​ကတ်​ယင်း ကြီးပြင်းပါလတ်​​တေ ​ကိုယ်​ရို့​မောင်​နှမ သူငယ်​ချင်းတ​တောစွာ အဂုဒေချိန်...

(ရပ်ဝီးမြီခြား လျှာဖျားနန့်ပြောရေဒေသမာ ပျောက်တေလူကပျောက်...။ ပင်လယ်ရပ်ခြား ဟမ်ဘာဂါစားရေဒေသကို ရောက်တေလူကရောက်...) မိမိရပ်ရွာမှာ စီးပွားရေးကမကောင်း နီရ ထိုင်ရစာက မကောင်းကေ လျှာရင်းအာရင်းနန့်​​ပြော​ရေ ကိုယ့်​ရီမြီကိုပစ်​ဗျာလ်​ ရိုးတဖက်​က လျှာဖျားနန့်​​ပြော​ရေ​ဒေသမာ က်ိုယ်​​ရောင်​​ဖျောက်​ဗနာ​ပျောက်တေလူက ပျောက်။ ပင်လယ်ရပ်ခြား နိုင်ငံခြားတိရောက်တေ လူကရောက်။ အဂုကျနော်ရို့​လေ့ ထိုင်းနိုင်ငံကို ရောက်နီကတ်​ပါရေမနား။ ​ယေခါ ပခက်က မီးလာရေ... (ငါ့ကိုကား မှတ်မိကတ်သိ့ယင့်လား.. မင်းရို့အချေခါ... မင်းရို့မောင်နှမတစ်စု ပျော်ကတ်စီဖို့ ငါ့ရင်ခွင်မာအပြည့်ထည့်ဗျာလ် ဘေးတိုင်တိလှုပ်ပါအောင် ငါယိုင်းထိုးခဖူးရေ...။ မင်းရို့သားသမီး ငါ့မြီးချေတိ ငါ့ရင်ခွင်မာ ဝင်ထိုင်ဖို့ ပြန်လာနိုင်ကတ်ဖို့သိလား !!!) နိုင်ငံခြား အသီးသီးနန့် တိုင်းတပါးတိကိုရောက်နီဂတ်တေ အားလုံးသော ရခိုင်သူ/ရခိုင်သားအပေါင်းရို့ကို အဖိုးပခက်က မီးလာပါဗျာလ်.. နိုင်ငံရီးကမကောင်း စီးပွားရီးက အဆင်​မ​ပြေလို့ ကိုယ့်​ရပ်​ကိုယ့်​မြီကိုပစ်​ဗျာလ်​ စီးပွားရှာ ပညာရှာရှာဖို့ ထွက်​လားကတ်​ယင်း ရပ်​ရွာတိမာ လူငယ်​လူလတ်​ပိုင်းတိ မကျန်​လိုက်​ယာယ်။ ရပ်​ဝီးမြီခြားမာ ဘဝသစ်​တိထူ​ထောင်​လားကတ်​ခါ သူရို့ကြီးပြင်းခ​ရေရွာ​ချေစွာ အ​ချေတိကစပ်​သံ စာဖတ်​သံတိတိတ်​ဗျာလ်​ ​ခြောက်​သွိတိန်းဆိတ်​နီလီယင့်​။ ယင်း ပခက်​ဝါကြီးက ​ဒေရွာမာ ငါ့ကို အဖက်​လုပ်ဖို့ အ​ချေ​တောင် မဟိဗျာလ်။ အိမ်ဘေးက နပြင်မှာ ငါ နုံးချင်းတည်း ဇာအချိန် ဇာလောက်အထိ မင်းရို့ ပြန်လာဖို့စာကို စောင့်ရဖို့သီးလဲ ..။ ငါ့ အသက်ကလည်း ထောက်လာဗျာလ်။ တလင်းသိမ်းလို့ မြောက်လီကဆုတ် တပေါင်းလ နွီရာသီလေ့​ရောက်လာဗျာလ်..။ ယေနန့်​ သင်္ကြန်မတိုင်ခင် ရပ်ဝီးမြီခြားမှာ နီဂတ်တေ မင်းရို့တိ အပြီးအပိုင် ပြန်လာကတ်ပါဖိ။ မှင်းကျိုးပင်အောက်က နီလို့ ငါမျှော်နီရေ... ဆိုဗျာလ်​ ယင်းကဗျာကို ​အဆုံးသတ်​ထားပါ​ရေ။ ယင်းချင့်​ကို အောက်မှာ ထပ်နားထောင်ကြည့်​ပါ။ (ဒေရွာမာ အဖက်လုပ်ဖို့လူမဟိရေငါ အိမ်ပေါက်ဝ နပြင်မာ နုံးချင်းတည်း ဇာအချိန်ထိ နီရဖို့သိ့လေးးး ငါ့အသက်လေ့ ထောက်လာယာယ် မြောက်လီလေ့ဆုတ် နွီသရုပ်လေ့ပေါ်လာယာယ် တလင်းလေ့ကျ လ,လေ့ပလာယာယ် သင်္ကြန်မတိုင်ခင် အပြီးအပိုင် ပြန်လာကတ်ပါဖိဝေ... မှင်းကျိုးပင်အောက်က ငါမျှော်နီရေ...) (အမျိုးသီလ နှစ်​ဌာနကို ပြည့်​ဝမဏ္ဍိုင်​ ​စောင့်​စွမ်းနိုင်​လို့ ရက္ခိုင်​နာမ ဘွဲ့မည်​လှဖြင့်​ အနွတ္တသညာ ​ခေါ်အပ်​ရာတည်း) လို့ "သျှင်​နာဂိန္ဒ​မော်​ကွန်း"မာ ​ဖော်​ညွှန်းခပါလီ​ရေ။ အမျိုးနန့်​သီလကို​စောင့်​ထိန်းခကတ်​လို့ ​ဒေလူမျိုးသည်​ ​အေ​လောက်​ထိတည်​တန့်​နိုင်​ခပါ​ရေ။ အဂု​ခေါတ်​ကာလမာဆိုပါ​ကေ အမျိုးနန့်​သီလ နှစ်​ခုတည်းနန့်​မရပါဗျာလ်​။ (အမျိုး သီလ နန့်​ ​ဒေသကိုပါ ​စောင့်​ထိန်းပါမှ ငါရို့ရခိုင်​တည်​တံ့နိုင်​အံ့ ရခိုင်​​မော်​ကွန်းအသစ်​တည်း)လို့ ​ပြန်​ဗျာလ်​ ရီးခြစ်​ ​မော်​ကွန်းသစ်​ထိုးချိန်​တန်​ဗျာလ်​လို့​ပြောကြားယင်း ဆရာ​ဂျော်​ဂျီ၏ ယိုင်းယင်​ယင်​ယိုင်း ကဗျာကို အဆုံးသတ်​လိုက်​ရပါ​ရေ။ 

ကိုဇင်​မျိုး (Map radio) (မဲ​ဆောက်​ ထိုင်းနိုင်​ငံ)

 ===================================================

 အသံဖိုင်နားထောင်ဖို့...

===================================================